有位行家朋友S, 對化妝髮型產品有獨有及深度嘅見解，見親佢我都跌錢！佢話好嘅，唔敢唔買；曾輕輕提過Dyson airwrap好用（佢只係試用咋喎），咁我做research後就走去買….
網上多以自用身份分享點用Dyson airwrap，咁我就以化妝師角度，示範點全面咁用响造型上。如化妝師正躊躇好無投資，希望呢篇會幫到你。
熱度：吹風梳始終成日徘徊頭皮上，唔好expect好似風筒咁嘅火數（但最大火時貼住頭皮都會辣熟嘅），溫火烘就安全，不過hold耐啲囉
操作：除左控制唔好辣親人外， 無難度嘅
音量：可接受
重量 ：好……重……唔該食飽飯至開工
用呢支造型梳示範點用盡配件做個髮型先～
髮卷
分30mm 40mm直徑，除非好長頭髮或要求微鬈，至用上40mm，呢個筒亦係令人雞手鴨腳嘅其中之一。
操作時唔好苛求髮片包得實個筒，唔同電棒要整齊入同包實支棒，以煮飯比喻：電棒係煎，吹風梳係烘，唔貼住個鑊都熟嘅。要由尾捲上，髮量多時，烘耐啲都有效果。近頭皮嘅操作就用溫火，而其他地方就用大火。
除左捲鬈，亦可令根部企，達蓬鬆感；可以當成carmen卷咁打底（長髮用40，短髮用30），多髮量時直接用手繞住支棒，快得多；亦可以做瀏海時立體啲，若本身有啲吹頭理念，都可用支棒做到近似。（只係似咋）
優點 | 缺點 |
鬈度充滿空氣感（電棒可以，但要用手整理）； | curve唔會有光澤 |
頭髮落左product後唔怕痴夾或難推； | 鬈度老氣單一，一定螺旋紋理，又無得個尾直少少， |
瀏海點整都唔貼頭 | 出風會影响隔離區，例如一早拉好線條….唔吹歪都吹到有髮絲跳出黎。補鬈嘅話用返電棒把啦！ |
補充：呢代hs05風咀可以自己調校，上一代hs01要更換左右風嘴。
順髮梳
拉直用，一般用响頭髮半乾情況下邊梳邊吹， 頭髮整齊
優點 | 缺點 |
當排骨梳咁用，可改變髮根方向，如洗界 | 啲梳齒硬，容易㧸到頭 |
可快速令髮根企到少少 | |
刷頭會左右擺，就算揨到頭會卸咁啲力 | |
抗毛躁風咀
吹乾頭髮外，仲有個「收絲」功能，令表面順滑，吹直必用。佢原理可吸起表面頭髮，壓返去筒個表面加熱，但只吹表面嗰浸，吹完真係少頭髪彈出黎。
圓頭豐髮梳
密集嘅梳齒將頭髮扯實，令鬈髪變得光滑有彈性， 除可髮尾內彎，又能令髮根企立...
優點 | 缺點 |
都係嗰啲啦....有彈性囉 | 離開頭髪時一唔小心就卡住，由其髮幼，會扯痛人 |
髪根快又簡單吹到企得黎，又有弧度 | 响頭皮上用大火又失走唔切，死撚梗，冷熱交替嗰下幾考功夫 |
總括黎講
無電棒咁耐鬈同靈活；
乾髮吹嘅話，難見到效果，要濕髪及配合product ;
就算集直板夾、電棒、梳 、風筒於一身都好，支野真係重又長，嬌小啲嘅人難駕馭，或者有"掌長肌"痛症；
配件大件又多，外妝唔啱；
如果工具係走簡約系、新手化妝師，支吹風梳就唔太啱（自用反而容易）；
如果覺得一般風筒難上手，咁佢補到能力上既不足，如收絲、做到空氣感、髮片加熱時唔會成塊膠片或痴夾。
Comments